قومی کرکٹ ٹیم کے وائٹ بال کپتان شاہین شاہ آفریدی کا کہنا ہے کہ سہ ملکی سیریز پاکستان کے لیے خاص اہمیت رکھتی ہے۔ ان کے مطابق، ٹیم نے ٹی ٹوئنٹی فارمیٹ میں اچھی کارکردگی کا مظاہرہ کیا ہے، جبکہ گزشتہ چار ون ڈے سیریز کے دوران ایک مضبوط ٹیم تشکیل دینے پر توجہ دی گئی۔ انہوں نے کہا کہ ٹیم کی بنیادی توجہ ورلڈ کپ پر ہے اور میگا ایونٹ کی ضروریات کو مدنظر رکھتے ہوئے وکٹیں تیار کرنے کی کوشش کی جا رہی ہے۔
شاہین شاہ آفریدی نے سلمان آغا کی صلاحیتوں کو سراہتے ہوئے کہا کہ وہ ایک اچھے کرکٹر ہیں اور فرسٹ کلاس کرکٹ میں ٹرپل سنچری بنا کر آ رہے ہیں۔ ان کے مطابق، سلمان آغا اپنے کردار اور ذمہ داریوں سے بخوبی واقف ہیں۔ کپتان نے کہا کہ وہ ہمیشہ ٹیم کے لیے بہترین کارکردگی دکھانے کی کوشش کرتے ہیں اور اس بار بھی اچھی پرفارمنس دینے کے لیے پُرعزم ہیں۔ انہوں نے مزید کہا کہ ٹیم میں باہمی ہم آہنگی موجود ہے اور تمام کھلاڑیوں کا ہدف ورلڈ کپ جیتنا ہے۔
قومی کپتان نے بابراعظم کو ٹیم کا اہم ستون قرار دیتے ہوئے کہا کہ ان پر کسی قسم کا دباؤ نہیں اور وہ ایک کلیدی کھلاڑی ہیں۔ ان کے مطابق، بابراعظم ماضی میں مسلسل پاکستان کے لیے رنز بناتے رہے ہیں۔ شاہین آفریدی نے کہا کہ تمام کھلاڑی ملک کے عوام کو خوشیاں دینے کے لیے پرعزم ہیں اور ٹیم 350 یا 400 رنز کے ہدف کا تعاقب کرنے کی صلاحیت بھی رکھتی ہے۔ ان کا کہنا تھا کہ ٹیم حالات اور وکٹ کی نوعیت کے مطابق کھیل پیش کرے گی، کیونکہ اس کے پاس ایک مضبوط بیٹنگ آرڈر موجود ہے اور اصل توجہ میچز جیتنے پر ہے۔
انہوں نے بتایا کہ نوجوان کھلاڑیوں کو مرحلہ وار مواقع فراہم کیے جاتے ہیں۔ شاہین آفریدی کے مطابق، بابراعظم کی ٹیم میں موجودگی قیادت کے حوالے سے بھی فائدہ مند ہے، کیونکہ انہیں کپتانی کا وسیع تجربہ حاصل ہے اور دوسرے کھلاڑی ان سے سیکھتے ہیں۔ انہوں نے مزید کہا کہ ون ڈے کرکٹ میں صائم ایوب کی بولنگ ٹیم کے لیے خاصی اہمیت رکھتی ہے۔
