بالی ووڈ اداکار ٹائیگر شروف پر فائرنگ کے واقعے میں مبینہ طور پر ملوث تینوں ملزمان کو بھارتی شہر کوٹا سے گرفتار کرلیا گیا ہے، جنہیں مزید کارروائی کے لیے ممبئی پولیس کے حوالے کیا جائے گا۔
بھارتی خبر رساں ادارے اے این آئی کے مطابق، کوٹا کی سپرنٹنڈنٹ پولیس تیجسوانی گوتم نے بتایا کہ گرفتار افراد میں ہریانہ کا رہائشی ریحان عرف سکّا، بہار سے تعلق رکھنے والا ہریتک کُرمی عرف روشن اور ایک کم عمر ملزم شامل ہیں۔
پولیس حکام کے مطابق، پیر کی صبح اطلاع موصول ہوئی تھی کہ فائرنگ کے واقعے میں ملوث تینوں مرکزی ملزمان ٹرین کے ذریعے کوٹا پہنچنے والے ہیں۔ اس اطلاع پر پولیس نے فوری کارروائی کرتے ہوئے صرف 15 منٹ کے اندر ٹرین کو گھیرے میں لے لیا۔ بعد ازاں بوگیوں کی مکمل تلاشی کے دوران تینوں ملزمان کو حراست میں لے لیا گیا۔
سپرنٹنڈنٹ پولیس تیجسوانی گوتم کے مطابق، ابتدائی تحقیقات سے معلوم ہوا ہے کہ فائرنگ میں ملوث ملزمان کے مبینہ طور پر گینگسٹر انیل پنڈت سے تعلقات ہیں، جس کے بارے میں کہا جاتا ہے کہ وہ لارنس بشنوئی گینگ سے رابطے میں ہے۔ تفتیش کے دوران انیل پنڈت اور ریحان کے درمیان رابطے کا بھی پتا چلا ہے۔
پولیس کا کہنا ہے کہ اب تک ملزمان سے کوئی اسلحہ برآمد نہیں ہوا، تاہم ان سے تفتیش جاری ہے تاکہ ہتھیاروں کے حوالے سے معلومات حاصل کی جاسکیں۔ ابتدائی تحقیقات کے مطابق، ملزمان پہلے دہلی جانے اور وہاں سے نیپال فرار ہونے کا ارادہ رکھتے تھے۔ تینوں افراد پونے سے جے پور جانے والی ایکسپریس ٹرین کی جنرل بوگی میں سفر کر رہے تھے۔
ممبئی پولیس کے مطابق، فائرنگ کا واقعہ اتوار کی شام تقریباً 7 بجے پیش آیا، جب ٹائیگر شروف جوہو میں قائم ایک فٹ بال کلب سے باہر نکل رہے تھے۔ الزام ہے کہ ملزمان نے اداکار کی گاڑی کو نشانہ بناتے ہوئے فائرنگ کی۔ تاہم ٹائیگر شروف کو براہ راست گولی نہیں لگی، البتہ ان کے ڈرائیور کو چوٹیں آئیں۔
واقعے کے بعد مہاراشٹر کے نائب وزیراعلیٰ ایکناتھ شندے نے اتوار کی رات ٹائیگر شروف کی رہائش گاہ پر جاکر ان سے ملاقات کی۔ انہوں نے بتایا کہ اداکار کے بائیں ہاتھ پر بارود اور شیشے کے ٹکڑے لگنے کے باعث زخم آئے ہیں۔
