پاکستان کے مڈل آرڈر بلے باز سلمان علی آغا نے سہ ملکی ون ڈے سیریز کے افتتاحی مقابلے میں سری لنکا کے خلاف سنچری اسکور کرنے کے بعد اپنے منفرد جشن کی وجہ واضح کردی۔ اس کے ساتھ ہی انہوں نے ڈومیسٹک کرکٹ کو مزید اہمیت اور عزت دینے کی ضرورت پر بھی زور دیا۔
اتوار کو کھیلے گئے سہ ملکی ون ڈے سیریز کے پہلے میچ میں پاکستان نے سری لنکا کو 37 رنز سے شکست دے دی۔
پاکستانی ٹیم پہلے بیٹنگ کرتے ہوئے 49.5 اوورز میں 305 رنز بنا کر آل آؤٹ ہوگئی۔ سلمان علی آغا نے عمدہ بیٹنگ کا مظاہرہ کرتے ہوئے 90 گیندوں پر 107 رنز اسکور کیے۔ یہ ان کے ون ڈے کیریئر کی چوتھی سنچری تھی۔
306 رنز کے ہدف کے تعاقب میں سری لنکن ٹیم 48.1 اوورز میں 268 رنز بنا کر پویلین واپس لوٹ گئی۔
میچ کے بعد پریس کانفرنس کرتے ہوئے سلمان علی آغا نے کہا کہ ان کے لیے کرکٹ کے تینوں فارمیٹس میں کارکردگی دکھانا اہمیت رکھتا ہے، تاہم خوش قسمتی سے ون ڈے کرکٹ میں ان کی پرفارمنس نسبتاً بہتر رہی ہے۔
انہوں نے مزید کہا کہ تینوں فارمیٹس میں ان کے بیٹنگ کے انداز میں کوئی خاص فرق نہیں آتا۔ ان کے مطابق انہیں نہ کسی کے سامنے کچھ ثابت کرنا ہے اور نہ ہی کسی کو جواب دینا ہے، کیونکہ انہیں کرکٹ سے محبت ہے اور پاکستان کی نمائندگی کرنا اچھا لگتا ہے۔
سنچری مکمل کرنے کے بعد اپنے منفرد انداز میں جشن منانے کی وضاحت کرتے ہوئے سلمان علی آغا نے بتایا کہ یہ انداز صرف ان کے بیٹے کے لیے تھا۔ ان کا بیٹا ٹیلی ویژن پر کرکٹ دیکھتے ہوئے اسی طرح خوشی کا اظہار کرتا ہے۔ انہوں نے واضح کیا کہ اس جشن کے ذریعے کسی کو پیغام دینا یا کسی کو غلط ثابت کرنا مقصود نہیں تھا۔
اپنے جشن کی وضاحت کے ساتھ سلمان آغا نے ڈومیسٹک کرکٹ کی اہمیت اجاگر کرتے ہوئے کہا کہ اس سطح پر رنز بنانے کے لیے مہارت اور سخت محنت درکار ہوتی ہے۔
ان کا کہنا تھا کہ ڈومیسٹک کرکٹ کو وہ عزت نہیں دی جاتی جس کی وہ مستحق ہے۔ انہوں نے زور دیا کہ ڈومیسٹک مقابلوں میں کھیلنا اور رنز بنانا آسان کام نہیں، جبکہ اس سطح پر عمدہ کارکردگی دکھانے والے کھلاڑی بین الاقوامی کرکٹ میں بھی اچھی پرفارمنس دے سکتے ہیں۔ ان کے مطابق ڈومیسٹک کرکٹ کھیلنے والے کھلاڑیوں کو مناسب عزت اور اہمیت ملنی چاہیے۔
سلمان علی آغا نے اعتراف کیا کہ گزشتہ تین ٹیسٹ میچز ان کے لیے اچھے ثابت نہیں ہوئے، تاہم وہ گزشتہ چار سال سے مسلسل کارکردگی دکھا رہے ہیں۔ انہوں نے کہا کہ بین الاقوامی کرکٹ میں فارم دوبارہ حاصل کرنے میں کچھ وقت لگتا ہے۔
واضح رہے کہ سلمان علی آغا کی یہ سنچری ان کے بین الاقوامی کیریئر کے ایک مشکل مرحلے کے بعد سامنے آئی ہے۔
انہوں نے انگلینڈ کے خلاف پہلے ٹیسٹ میچ میں پاکستان کی قیادت کی تھی، لیکن دوسرے ٹیسٹ کے لیے انہیں ٹیم میں شامل نہیں کیا گیا۔ اس کے بعد تیسرے ٹیسٹ سے قبل اسکواڈ میں بڑی تبدیلیوں کے دوران سات دیگر کھلاڑیوں کے ہمراہ سلمان آغا کو بھی وطن واپس بھیج دیا گیا تھا۔
انگلینڈ کے دورے سے واپسی کے بعد سلمان آغا نے پریذیڈنٹ ٹرافی گریڈ ون میں کنگز مین اکیڈمی کی نمائندگی کی۔ انہوں نے پانچ میچز میں حصہ لیا اور اپنے پہلے ہی مقابلے میں ناقابلِ شکست 300 رنز بنا کر نمایاں توجہ حاصل کی۔
بعد ازاں انہیں پاکستان کی ٹی ٹوئنٹی انٹرنیشنل ٹیم کی کپتانی سے بھی ہٹا دیا گیا اور ان کی جگہ صاحبزادہ فرحان کو کپتان مقرر کردیا گیا۔ سلمان آغا کو سری لنکا کے خلاف ٹی ٹوئنٹی انٹرنیشنل سیریز کے لیے قومی اسکواڈ میں بھی جگہ نہیں ملی، جس میں پاکستان نے 2-1 سے کامیابی حاصل کی۔
