ترجمان دفتر خارجہ نے ہفتہ وار پریس بریفنگ کے دوران بتایا کہ وزیراعظم شہباز شریف نے سعودی عرب پر حوثی حملوں کی سخت الفاظ میں مذمت کی ہے۔ ان کے مطابق 2 اکتوبر کو طیبہ پاور ڈسٹری بیوشن اسٹیشن کو نشانہ بنانا ایک سنگین اشتعال انگیز اقدام ہے۔ انہوں نے کہا کہ حرمین شریفین کے تقدس اور تحفظ کو ہر صورت یقینی بنایا جانا چاہیے۔
ترجمان دفتر خارجہ کا کہنا تھا کہ پاکستان مکہ مشترکہ دفاعی معاہدے کے تحت سعودی عرب کے ساتھ مکمل یکجہتی کا اظہار کرتا ہے اور اس کی خودمختاری، علاقائی سالمیت، سلامتی اور تحفظ کی حمایت جاری رکھے گا۔ انہوں نے بتایا کہ مکہ دفاعی معاہدے کی اسٹریٹجک، سیاسی اور دفاعی کمیٹی کا اجلاس منعقد ہوا، جس میں نائب وزیراعظم اسحاق ڈار اور فیلڈ مارشل نے ہنگامی طور پر شرکت کی۔ اجلاس کے دوران مشترکہ دفاعی معاہدے کے تناظر میں خطے کی صورتحال کا جائزہ لیا گیا اور دفاع کے لیے ٹھوس اقدامات کرنے کا فیصلہ کیا گیا۔
ترجمان کے مطابق اجلاس میں اجتماعی دفاع کے عزم کو ایک بار پھر دہرایا گیا۔ انہوں نے واضح کیا کہ مکہ مشترکہ دفاعی معاہدے میں شامل ممالک کی سلامتی ایک دوسرے کے تحفظ سے منسلک ہے۔ ان کا کہنا تھا کہ ماسکو فارمیٹ اجلاس میں پاکستان نے افغانستان سے جنم لینے والی دہشت گردی پر اپنے تحفظات واضح طور پر پیش کیے۔ افغانستان سے پھیلنے والی دہشت گردی پڑوسی ممالک، بالخصوص پاکستان، کے لیے ایک سنگین خطرہ ہے۔
ترجمان دفتر خارجہ نے مزید کہا کہ پاکستان نے غزہ میں تنازع ختم کرنے اور ایک قابلِ اعتماد سیاسی عمل کو آگے بڑھانے کے مقصد سے بورڈ آف پیس میں شمولیت اختیار کی ہے۔ پاکستان نے غزہ امن منصوبے اور اقوام متحدہ کی سلامتی کونسل کی قرارداد 2735 پر مکمل عمل درآمد کی ضرورت پر زور دیا۔
انہوں نے بتایا کہ اقوام متحدہ کے سیکریٹری جنرل نے پاکستان کے ساتھ قریبی رابطہ اور تعاون برقرار رکھنے کے عزم کا اعادہ کیا۔ پاکستان کا مؤقف ہے کہ فلسطینی عوام کو 1967 سے قبل کی سرحدوں کی بنیاد پر ایک آزاد اور خودمختار ریاست کا حق ملنا چاہیے۔
