بالی وڈ کے معروف اداکار سلمان خان نے انکشاف کیا ہے کہ انہیں اپنے بیڈروم میں کسی ایسی غیر مرئی قوت کی موجودگی کا احساس ہوتا تھا جسے انہوں نے کبھی اپنی آنکھوں سے نہیں دیکھا۔
ڈائریکٹر اور پروڈیوسر کرن جوہر کے شو میں گفتگو کرتے ہوئے سلمان خان نے بتایا کہ وہ اپنے بیڈروم میں خود کو کبھی تنہا محسوس نہیں کرتے تھے، کیونکہ انہیں لگتا تھا کہ وہاں کوئی اور بھی موجود ہے، حالانکہ انہوں نے اسے کبھی نہیں دیکھا تھا اور صرف اس کے بارے میں سنا تھا۔
اداکار کے مطابق، جب بھی وہ کمرے سے باہر جاتے تو لائٹس خود بخود جلنے اور بجھنے لگتیں، الماریوں کے دروازے کھل جاتے اور میوزک سسٹم بھی خود ہی چلنے لگتا تھا۔ انہوں نے مزید بتایا کہ باتھ روم میں موجود ہونے کے دوران بھی انہیں باہر کسی کی موجودگی کا احساس ہوتا، جیسے کوئی الماریوں کے دروازے کھول رہا ہو۔
کرن جوہر نے سلمان خان سے سوال کیا کہ کیا ان کے کمرے میں جنات موجود تھے؟ اس پر اداکار نے وضاحت کی کہ یہ ضروری نہیں کہ وہ جنات ہی ہوں، تاہم انہیں اپنے آس پاس کسی کی ’موجودگی‘ ضرور محسوس ہوتی تھی۔
سلمان خان نے کہا کہ انہیں اس تجربے سے خوف محسوس نہیں ہوا، کیونکہ اس غیر مرئی موجودگی سے انہیں کبھی کوئی نقصان نہیں پہنچا۔ انہوں نے مزاحیہ انداز میں یہ بھی کہا کہ ان کی طرف سے صرف اتنی درخواست تھی کہ اگر وہ واقعی کوئی خوبصورت عورت ہے تو ان کے سامنے آ جائے۔
