دی لیجنڈ آف مولا جٹ، نے بالاخر پاکستان کی تاریخ کی پہلی فلم ہونے کا اعزاز حاصل کرلیا جو صرف ڈومیسٹک سرکٹ میں سو کروڑکا بزنس کرچکی ہے۔ نئے سال کے آغاز پر یہ خوش خبری سب سے پہلے دی لیجنڈ آف مولا جٹ، کے ڈائریکٹر بلال لاشاری نے بریک کی۔
بلال نے اپنے ٹوئیٹر ہینڈل پر شیئر کیا کہ دی لیجنڈ آف مولا جٹ، نے باضابطہ طور پرڈومیسٹک باکس آفس پر 100 کروڑ اور دنیا بھر میں 10 ملین ڈالر سے تجاوز کر لیا ہے۔ انہوں نے دی لیجنڈ آف مولا جٹ، کی پوری ٹیم اور دنیا بھر میں مداحوں کا بھی شکریہ ادا کیا جنہوں نے اس فلم کو شاندار کامیابی دی۔
Perfect timing as #thelegendofmaulajatt crosses 100 Cr. tonight at the Box Office in Pakistan and $10 milion worldwide. Once again, a big thank you to team MJ and fans of #TLOMJ across the world who made this film a roaring success. Wishing you all a very happy new year! pic.twitter.com/CyGT4kGtTU
— Bilal Lashari (@blashari) December 31, 2022
اسی رات امریکی چینل سی این این نے فلم کے ہیرو فواد خان کو بھی لائیو ویڈیو کال پر لیا اوران سے اس کامیابی پر تاثرات معلوم کیے۔
فواد خان نے کہا کہ پاکستانی سنیما کے لیے 2022 سب سے بڑا سال رہا ہے، جس کی بنیادی وجہ بلال لاشاری کی ہدایت کاری میں بننے والی یہ فلم ہے۔
اس فلم نے جس طرح کا بزنس کیا ہے، جس طرح فلم سازی کی حدود کو آگے بڑھایا ہے، اس کا آنے والے سالوں پر گہرا اثر پڑے گا۔
دی لیجنڈ آف مولا جٹ، کی بھارت میں نمائش کے حوالے سے انہوں نے کہا کہ یہ بہت اچھا ہوگا، اگر ایسا ہوتا ہے تو یہ دونوں ملکوں کو قریب لانے کا بہترین طریقہ ہے۔ میرے خیال میں یہ ان مٹھائیوں اور لذتوں کی طرح ہے جو ہم عید اور دیوالیوں پر ایک دوسرے کو بھیجتے ہیں۔ فلم اور موسیقی اس قسم کا تبادلہ ہے لیکن دونوں طرف معاملات اب بھی تھوڑے گرم ہیں۔
فواد خان نے مس مارول کے ساتھ ایم سی یو کا حصہ بننے کے بارے میں بھی بتایا۔
دی لیجنڈ آف مولا جٹ، کی کامیابیوں اور ریکارڈز کا سلسلہ ابھی جاری ہے اور مجموعی طور پر فلم کا ورلڈ وائیڈ بزنس 230 کروڑ روپے ہوچکا ہے۔
