ملک میں سونے کی قیمتوں میں کمی کا سلسلہ برقرار ہے، آج بھی فی تولہ سونا مزید سستا ہوگیا۔
آل پاکستان صرافہ جیمز اینڈ جیولرز ایسوسی ایشن کے مطابق سونے کی فی تولہ قیمت میں ایک ہزار روپے کی کمی ہوئی، جس کے بعد نئی قیمت 4 لاکھ 62 ہزار 136 روپے فی تولہ ہوگئی۔
ایسوسی ایشن کے اعداد و شمار کے مطابق 10 گرام سونے کی قیمت بھی 857 روپے کم ہوئی، جس کے بعد اس کی نئی قیمت 3 لاکھ 96 ہزار 207 روپے ہوگئی۔
ادھر عالمی مارکیٹ میں بھی سونے کے نرخ میں کمی دیکھی گئی، جہاں فی اونس قیمت 10 ڈالر گھٹ کر 4 ہزار 396 ڈالر پر آگئی۔
واضح رہے کہ گزشتہ روز بھی ملک میں سونے کی فی تولہ قیمت میں 2 ہزار 400 روپے کی نمایاں کمی ریکارڈ کی گئی تھی۔
سونے کے نرخ میں تبدیلی پر عالمی مارکیٹ کی قیمتوں، امریکی ڈالر کی قدر میں اتار چڑھاؤ، عالمی اقتصادی غیر یقینی اور جغرافیائی و سیاسی کشیدگی جیسے عوامل اثر انداز ہوتے ہیں۔
دنیا بھر میں معاشی یا سیاسی بے یقینی بڑھنے کی صورت میں سرمایہ کار اکثر سونے کو محفوظ اثاثہ تصور کرتے ہیں۔ اس دوران سونے کی طلب بڑھنے سے اس کی قیمت میں بھی اضافہ ہوسکتا ہے۔
اسی طرح عالمی سطح پر شرح سود میں کمی یا مستقبل میں شرح سود کم ہونے کی توقعات بھی سونے کے نرخ کو متاثر کرتی ہیں۔ شرح سود کم ہونے پر ایسے اثاثوں کی کشش بڑھ جاتی ہے جو باقاعدہ سودی آمدن فراہم نہیں کرتے، جن میں سونا بھی شامل ہے۔
پاکستانی مارکیٹ میں عالمی سطح پر سونے کی قیمت کے علاوہ روپے اور امریکی ڈالر کے درمیان شرح تبادلہ بھی مقامی صرافہ بازار میں سونے کے نرخ کے تعین میں اہم کردار ادا کرتی ہے۔
