آرٹسٹ سپورٹ فنڈ کے لیے درخواستوں کی وصولی شروع

حکومت پنجاب کی جانب سے فن کاروں کی خدمات کے اعتراف اور ان کی سماجی و معاشی سرپرستی کے لیے آرٹسٹ سپورٹ فنڈ 2023-24 کے لیے درخواستوں کی وصولی کے عمل کا آغاز کر دیا گیا ہے۔ فنون لطیفہ کے مختلف شعبوں جن میں فلم، ٹی وی، ریڈیو، تھیٹر، میوزک، رقص، پینٹنگ، خطاطی، مجسمہ سازی، تکنیکی شعبہ جات، ایڈیٹرز، ساؤنڈ ریکارڈرز، لائٹس مین، کیمرہ مین، سٹنٹ مین، میک اپ آرٹسٹ شامل ہیں، میں ٗآرٹسٹ اپنی درخواستیں لاہور آرٹس کونسل الحمراء، پنجاب آرٹس کونسل اور متعلقہ ڈویژنل ڈائریکٹر آف پنجاب آرٹس کونسل میں جمع کروا سکتے ہیں۔ درخواست گزار کی اہلیت کے لیے 25 برس کا تجربہ لازم ہے جبکہ 35 ہزار سے کم آمدنی والے آرٹسٹ ہی آرٹسٹ سپورٹ فنڈ میں اپنی درخواست دینے کے اہل ہیں۔ آرٹسٹ سپورٹ فنڈ میں مرد فن کاروں کے لیے عمر کی حد کم از کم 50 جبکہ خواتین کے لیے عمر کی حد کم از کم 45 برس رکھی گئی ہے۔ واضح رہے اس پروگرام میں صرف صوبہ پنجاب کے آرٹسٹ ہی 4 اگست تک اپنی درخواستیں جمع کروا سکتے ہیں۔ خواہش مند فن کار محکمہ اطلاعات وثقافت کی ایپ ”فن کار“ کو گوگل پلے سٹور سے ڈاؤن لوڈ کر کے اپنا اندراج کرواسکتے ہیں۔ علاوہ ازیں معذور فن کاروں کے لیے عمر و تجربہ کی کوئی قید نہ ہے۔ مزید براں تمام فن کاروں کی موجودہ وہ فہرست جس کی بنیاد پر وہ ماہانہ وظیفہ وصول کر رہے ہیں، رواں مالی سال 2022-23 کے اختتام پر کینسل تصور ہوں گی۔ مالی سال 2023-24 میں وظیفہ یا مالی امداد حاصل کرنے کے اہل صرف وہ فن کار ہوں گے جو آرٹسٹ سپورٹ فنڈ 2023-24 کے تحت اپنی درخواستیں جمع کروائیں گے اور جو فن کار درخواست نہیں دیں گے وہ مالی سال 2023-24 میں وظیفہ یا مالی امداد کے اہل تصور نہیں ہوں گے۔