ڈرامہ رولے مہک ملک دے، تماثیل تھیٹر میں آٹھ روز جاری رہنے کے بعد اختتام پذیر ہوگیا۔ اختتامی تقریب میں مہک ملک نے پروڈیوسر قیصر ثناء اللہ خان کی تعریفوں کے پل باندھ دئیے۔ فن کاروں میں تحائف اور نقد انعامات تقسیم کیے گئے۔ تفصیلات کے مطابق عید الاضحیٰ پر تماثیل تھیٹر میں پیش کیا جانے والا میگا بجٹ کا ڈرامہ رولے مہک ملک دے، کامیابی سے ہمکنار ہوا۔ ڈرامہ کے آخری شو کے اختتام پر ایک پروقار اور رنگارنگ تقریب منعقد کی گئی جس میں مہک ملک نے تماثیل تھیٹر کے پروڈیوسر قیصر ثناء اللہ خان اور ان کی ٹیم کا شکریہ ادا کیا اور کہا کہ ان کو یہاں ڈرامہ کرکے بہت اچھا لگا۔ لاہور میں میرا یہ دوسرا ڈرامہ تھا لیکن یہاں پر جس طرح سے میرے سمیت ہر آرٹسٹ کا خیال رکھا جاتا ہے، قابل تحسین ہے۔
تقریب کی میزبانی کے فرائض سرفراز وکی نے انجام دئیے۔ فن کاروں میں مہمان خصوصی ڈاکٹر منظور، بلال چوہدری اور امجد ضیاء نے تحائف اور نقد انعامات تقسیم کیے۔ تقریب میں مہک ملک، سونو بٹ، آیان اختر، چاہت علی، نایاب خان، طاہر انجم، امجد رانا، گڈو کمال، شاہد اقبال، شاہ زیب مرزا، ظفر ارشاد، ظفر کوڈو، عمران بلا سمیت دیگر موجود تھے۔
