دودا، وہ پہلی بلوچی فلم ہے جو سنیماگھروں کی زینت بننے جارہی ہے۔ نوجوان ڈائریکٹر عادل بزنجو کی یہ فلم ایک محنت کش بلوچ باکسر دودا، کی کہانی ہے جو معاش کے جنگ لڑنے کے ساتھ ساتھ اکھاڑے میں اپنے حریف سے بھی نبردآزما ہے۔ میٹرو لائیو موویز کو یہ اعزاز حاصل ہونے جارہا ہے کہ فلمی تاریخ کی پہلی بلوچی مووی اس ادارے کے توسط سے سنیماگھروں کی زینت بن رہی ہے۔ دودا، کے بلوچی ورژن کے ساتھ ہی فلم کا اُردو ڈب ورژن بھی ملک بھر میں ریلیز کیا جارہا ہے۔ حال ہی میں فلم کا آفیشل پوسٹر جاری کیا گیا ہے جس میں معروف ماڈل اور اداکار شعیب حسن کو ایکشن میں دیکھا جاسکتا ہے۔ شعیب حسن، اس فلم میں ٹائٹل رول نبھارہے ہیں۔ دودا، کا بلوچی ورژن ٹریلراور اُردوورژن ٹیزر یوٹیوب پر دیکھا جاسکتا ہے جبکہ فلم کا اُردو ورژن ٹریلرتاریخ نمائش کے ساتھ جلد ہی ریلیز کیا جائے گا۔
اس فلم کی خاص بات یہ بھی ہے کہ پاکستان کی پہلی بلوچی فلم بنانے اور اسے سنیماگھروں تک لانے کی خواہش دل میں ہی لیے دُنیا سے رخصت ہوجانے والے اداکار، فلم ساز و ہدایت کار انور اقبال مرحوم ناصرف اس فلم کا حصہ ہیں بلکہ یہ فلم انہیں ڈیڈیکیٹ بھی کی گئی ہے۔ اداکار و ہدایت کار انور اقبال مرحوم نے یہ فلم 1975 میں بنائی تھی جو سنیماگھروں کی زینت نہ بن سکی۔ فلم کی کہانی رومانوی داستان حمل و ماہ گنج، پرمبنی تھی۔
دودا، کی کاسٹ میں شعیب حسن، ابیلا کرد، فضا بی بی، عطا گل، عمران بلوچ، گمنام، وسیم بزنجو، شاہ بلوچ، شکیل مراد، ایاز علی، اختر دانش، شکور بلوچ اور انور اقبال شامل ہیں۔
فلم کے پروڈیوسرز عمران ثاقب اور حبیب حسن ہیں جبکہ اسکرین پلے رائٹر، سنیما ٹوگرافر اور ڈائریکٹر عادل بزنجو ہیں۔ نغمات عمران ثاقب، میوزک مزمل اور علیم بلوچ نے دیا ہے۔ اسکرپٹ ثاقب بزنجو، عادل بزنجو اور جاوید شائے نے لکھا ہے۔
دودا، کی ریلیز عید الفطر کے بعد کسی ہفتے ممکن ہے۔