میٹرو لائیو نے آپ کو سب سے پہلے یہ خبر دی تھی کہ غیرملکی پنجابی فلم چل میرا پت، سمیت دیگر غیر ملکی فلموں کو پاکستان میں نمائش کی اجازت کا فیصلہ حکومتی سطح پرکیا جاچکا ہے ۔ اس حوالے سے تازہ ترین خبر یہ ہے کہ یوکے بیسڈ پروڈکشن پانی وچ مدھانی، کو اسلام آباد سے این او سی جاری کیا جارہا ہے اور 5نومبر سے یہ فلم بھارت سمیت پاکستان میں بھی ریلیز کی جارہی ہے۔ اس سے قبل فلم کی نمائش چند ملکوں میں کی جاچکی ہے لیکن اب ورلڈ وائیڈ یہ پنجابی فلم بھرپور تشہیر کے ساتھ ریلیز کی جارہی ہے۔
پانی وچ مدھانی، کی کاسٹ میں گپی گریوال، نیرو باجوہ، کرم جیت انمول، نرمل رشی، ملکیت رونی اور پاکستانی اداکارافتخار ٹھاکر شامل ہیں۔ فلم کے ڈائریکٹر وجے کمار اروڑاہیں۔
پانی وچ مدھانی، ایک ناکام گلوکارکی کہانی ہے جو اپنے گروپ کے ساتھ کامیابی کے لیے شارٹ کٹس کی تلاش میں رہتے ہیں لیکن ان کی نئی گروپ ممبر سوہنی، ان کی سوچ بدل دیتی ہے۔ وہ اپنی قسمت بدلنے کے لیے ایک لاٹری ٹکٹ خریدتے ہیں اور خوش قسمتی سے ان کا انعام بھی نکل آتا ہے لیکن حادثاتی طور پر یہ لاٹری ٹکٹ کہیں کھوجاتا ہے۔اب ٹکٹ کی تلاش شروع ہوتی ہے اور اس دوران ان کرداروں کو احساس ہوتا ہے کہ کامیابی شارٹ کٹس سے نہیں بلکہ ہارڈ ورک سے ہی ممکن ہے۔
پانی وچ مدھانی، کی پری ریلیز ہائپ اورگپی گریوال سمیت لونگ لاچی فیم ایکٹریس نیرو باجوہ کی پاکستان میں مقبولیت کو دیکھتے ہوئے یہ کہنا مشکل نہیں کہ یہ فلم پاکستانی باکس آفس پر بلاک بسٹرثابت ہونے والی ہے۔