انٹرنیشنل پاکستان پرسٹیج ایوارڈز، بین الاقوامی سطح پر ہونے والا سب سے بڑا آزاد اورستاروں سے مزین پاکستانی ایونٹ
برطانیہ میں دو اور ناروے میں ایک کامیاب شو کے انعقاد کے بعد اس بار استنبول کی فضاﺅں میں اپنا جادو جگانے کے لیے تیار ہے۔ ایوارڈز کی تقریب 31 اکتوبر 2021 کو ہیلی کانگریس سینٹر استنبول میں منعقد کی جائے گی۔
یاد رہے کہ پہلے آئیپا ایوارڈ کا انعقاد پاکستان کے 70سال مکمل ہونے پر2017ءمیں عمل میں آیا جس کے بعد یہ سلسلہ آج تک انتہائی شاندار انداز میں جاری ہے۔ ماضی میں ان ایوارڈز کو میڈیا اور شوبز انڈسٹری کی بھرپور حمایت حاصل رہی ہے اور امید کی جارہی ہے کہ خاص طور پر ایسے وقت میں جب معاشی سرگرمیاں کم ہورہی ہیں اور بین الاقوامی تقریبات منسوخ یا ملتوی کر دی گئی ہیں۔ اس سال بھی اس روایت کو برقرار رکھا جائے گا اور ہماری بہت سی مشہور شخصیات امسال بھی پاکستان کی نمائندگی کریں گی اور پاکستانی سنیما، ٹیلی ویژن، فیشن اور موسیقی کو فروغ دے کر ہمارے ملک کی ترقی پسند تصویر کو باقی دنیا کے سامنے پیش کریں گی۔
آئیپا کے دو بانیوں علی ملک اورمختار احمد نے نہایت پرجوش انداز میں تقریب کی تفصیلات کا اعلان کیا۔ اس موقع پر علی ملک نے کہا ”ہمیں اس بار وبائی امراض کی بدولت بہت سے چیلنجوں کا سامنا کرنا پڑا ہے جس میں ایونٹ کو چند بار ملتوی کرنا پڑا یہاں تک کہ ایونٹ کے مقام کی تبدیلی بھی شامل ہے لیکن ہم تمام تر مشکلات کے باوجود پاکستان کا پرچم بلند رکھنے کے لیے پرعزم ہیں۔ کوویڈ 19 ایس او پیز کو مدنظر رکھتے ہوئے ہم ایک آڈیٹوریم میں اس تقریب کا اہتمام کر رہے ہیں جس میں مقررہ ہدف سے دگنے حاضرین کو بھی ایڈجسٹ کیا جاسکتا ہے۔ انشاءاللہ ہم شرکا اور اسٹیک ہولڈرز کو کسی خطرے میں ڈالے بغیر یہ ایونٹ منعقد کرانے میں کامیاب ہوجائیں گے۔“
مختار احمد نے کہا ”ہمیں امسال زیادہ ٹکٹس فروخت نہ کئے جانے کی وجہ سے آئیپا سے کم آمدنی ہوگی اس کے باوجود ہم نے اس سال بھی آئیپا ایوارڈز کے انعقاد کا فیصلہ کیا ہے۔ ہم محسوس کرتے ہیں اپنے مداحوں اور معاونین کو مایوس نہ کرنا اور اپنی صلاحیتوں کو دنیا کے سامنے پیش کرتے رہنا ہمارا فرض ہے۔“
